Advan I6 fotoekrani1
Celulare e Tablet Recensione

Advan I6: Indoneziani me Sistem Operativ të vetin

Përgjatë artikujve tanë, disa herë kemi marrë në shqyrtim smartfonë që ju, pa dashur t’ju paragjykoj, ndoshta nuk i keni njohur ndonjëherë më parë. Pse? Sepse vijnë nga vende që nuk përfitojnë shumë nga dukuria e globalizimit, siç përfitojnë vende të tjera, më të fuqishëm, produktet e të cilëve njihen nga masa më e madhe e planetit. Po, sot do t’ju flasim pikërisht për një të tillë. Quhet Advan I6.

Kjo është njëra nga arsyet që kemi trajtuar dhe do të vazhdojmë të trajtojmë smartfonët e çdo lloji, nga çdo vend. Tregu i telefonave nuk është monopol, por as mendja e njeriut nuk duhet kurrsesi të ketë diapazonin që ofron një monopol. Njeriu duhet të njohë një gamë të gjerë produktesh, në kushtet e globalizmit. Edhe kur vjen fjala te një smartfon nga… hmm, Indonezia?

Advan I6 fotodetaje1

Advan I6: Rrjeti

Advan I6 doli në treg në muajin Janar 2018. Indoneziani Advan I6 ofron shërbim rrjeti 2G, 3G dhe 4G, respektivisht në bandat dhe frekuencat: 2G – GSM 850, 900, 1900 dhe 2100MHz; 3G – WCDMA 2100MHz, si dhe 4G – B3 (1800+MHz), B5 (850MHz), B8 (900MHz) e B40 (TD 2300MHz). Në rrjetin 4G punon me teknologjinë LTE Cat 4 (Kategoria 4) me shpejtësinë 150/50 Mbps (shpejtësi mesatare në spektrin e kategorive të LTE-së).

Advan I6 fotodetaje2

Advan I6: Ekrani

Advan I6 punon me dy karta SIM, të dyja njëkohësisht aktive. Dimensionet e tij janë 149.1×71.7×8.95 milimetra. Madhësia e ekranit është 5.5 inç, e dhënë e cila kontribuon në bindjen e përgjithshme se kudo në botë tashmë madhësia standard e ekraneve të smartfonëve ka ndryshuar. Ajo nuk është më 5 inç, por 5.5 inç. Rezolucioni është 1280×640 piksela. Siç mund të shihet fare lehtë nga përpjesëtimi aritmetik i numrit të pikselave të gjatësisë dhe gjerësisë së ekranit, raporti i aspektit (aspect ratio) është 18:9 ose 2:1, tendenca më e fundit e ekraneve. Teknologjia e ekranit është IPS LCD, ndërsa mbrojtja e tij sigurohet me teknologjisë Gorilla Glass të prodhuesit Corning.

Advan I6 fotodetaje3

Advan I6: Sistemi Operativ

Advan I6 është i dyti telefon që marrim në analizë, i cili ka zhvilluar një Sistem Operativ të vetin, duke u bazuar mbi Androidin. I pari që prezantuam ishte kinezi 360 N6, i cili së bashku me vëllezërit e tij 360 N6 Pro dhe 360 N6 Lite ishte pajisur me sistemin 360OS, bazuar në Android. Advan I6 ka bërë të njëjtën gjë. Ai ka zhvilluar sistemin operativ IDOS (Indonesia Operating System), i cili gjendet në versionin 7.2, duke u bazuar në Android 7.0 Nougat. Kjo është bërë jo vetëm për të pasur një sistem operativ ekskluziv të vetin, me burim të mbyllur (closed source) e me licensë të patentuar (proprietary license), por edhe për t’u përshtatur me nevojat dhe kërkesat e konsumatorit indonezian. Na besoni, në Indonezi ky zhvillim është kthyer në krenari kombëtare brenda lëmit të teknologjisë!

Advan I6 fotodetaje4

Advan I6: Proçesori & Kujtesa

Advan I6 fuqizohet nga një proçesor MediaTek MTK6737. Proçesori është 64-bit, katërbërthamësh (quadcore). Shpejtësia e tij është 1.25 GHz. Është për t’u nënvizuar se ky proçesor u përshtatet më shumë parametrave të pjesëve të tjera të smartfonit Advan I6 (RAM-it, rezolucionit të ekranit, kamerës etj.). Këto të fundit gjenden në kufijtë maksimalë të pranueshmërisë së MTK6737. Përsa i përket grafikës, ajo mundësohet nga njësia e përpunimit grafik (GPU) ARM Mali-T720, me shpejtësinë 650 MHz. Kujtesa e përkohshme RAM e ka kapacitetin 2GB, ndërsa kapaciteti i brendshëm i telefonit është 16GB. Kjo kujtesë mund të zgjerohet së jashtmi me një kartë memorieje të zhvendosshme MicroSD me kapacitet maksimal prej 64GB.

Advan I6 fotodetaje5

Advan I6: Kamera

Smartfoni Advan I6 është i pajisur me dy kamera: një kryesore të pasme dhe një dytësore të përparme. Kamera parësore e pasme ka rezolucion 13 Megapiksel. Filmon video me gjerësi 1080 piksela. Kamera dytësore e përparme ka rezolucion të vogël dhe lë për të dëshiruar: vetëm 5 Megapiksel, dhe filmon me gjerësinë 720 piksela. Ky rezolucion nuk u përgjigjet as kërkesave të sotme dhe as trendit. Duke qenë se fotografia po përqendrohet tek vetja dhe po bëhet gjithnjë e më e largët me tjetrin, peisazhin, hapësirën përballë fotografit me telefon, prodhuesit e smartfonëve po i japin përparësi kamerës (kamerave) të përparme, duke i(u) dhënë asaj (atyre) karakteristika deri në dyfishin e parametrave të kamerës (kamerave) së pasme, duke i kthyer ato në dytësore. Shpejtësia e filmimit të videove për të dyja kamerat është 30fps (frames per second – korniza për sekondë). Është për t’u theksuar se, jo vetëm për këtë telefon por në përgjithësi për të gjithë tregun e smartfonëve, shpejtësia e filmimit (fps) nuk po përparon, por vazhdon të qëndrojë me stoicizëm në vlerën 30 korniza për sekondë. Ky nuk është një zhvillim aspak i mirë, duke ditur se sa fantastike duken videot me shpejtësitë 50fps dhe 60fps. Ndoshta të gjithë i kemi parë video të tilla. Në të vërtetë shumë njerëzve u duket si filmim me xhiro të shpejtë (fast forëard). Faktikisht kornizat thjesht ndërrohen më shpejt!

Advan I6 fotodetaje6

Advan I6: Ndërlidhja

Advan I6 lidhet me rrjetin Wireless (WLAN, Wi-Fi) në frekuencën 802.11 b, g, n. Ai është i pajisur me Bluetooth në versionin 4.0. Fatkeqësisht, lidhja me MicroUSB nuk është në versionin 3.0 e Tipit C me shpejtësi shumë të lartë, por vetëm në versionin 2.0. Advan I6 ka përparësi nga shumë smartfonë të tjerë edhe nga ata të kategorisë High-End, disponimin e portës së kufjeve ose të bokseve 3.5 milimetërshe. Kjo është një veçori tepër e dëshiruar prej konsumatorëve, por në një lëvizje të papritur, dizenjatorët e modeleve më të mirë të smartfonëve të markave të njohura kanë vendosur ta heqin atë. Advan I6 është i pajisur gjithashtu edhe me Radio FM.

Advan I6 fotodetaje7

Advan I6: Bateria

Bateria e telefonit Advan I6 është e heqshme. Ajo ka një kapacitet 3300 mAh (Miliamper orë). Ky kapacitet qëndron në vlera mbi mesataren, krahasuar me shumë smartfonë të tjerë, e nëse bëjmë një renditje.

Advan I6 fotodetaje8

Advan I6: Çmimi

Çmimi i Advan I6 është 1,499,000 IDR (Rupiah Indonezianë), ose i këmbyer, 88.7 EUR (Euro).

Advan I6 fotodetaje9

Advan I6 fotodetaje10

Marin Kamberi
Ekonomist dhe përkthyes i apasionuar pas teknologjisë dhe sidomos pas smartfonëve. Gjeta hapësirën për të shkruajtur tek "ose.al - Shtëpia e teknologjisë", ku shpirti i skuadrës dhe pasioni ka formuar një portal pararojë për të gjithë shqiptarët.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.